Sauti Sol Washukuru Mashabiki Baada ya Mafanikio ya Sol Fest 2025
Robert Elim December 22, 2025
Comments (0)

Sauti Sol Washukuru Mashabiki Baada ya Mafanikio ya Sol Fest 2025

Kundi la muziki kutoka Kenya, Sauti Sol, limewashukuru mashabiki na wadau mbalimbali waliojitokeza kwa wingi na kuunga mkono tamasha lao la Sol Fest 2025, licha ya kuwepo kwa ushindani mkali kutoka kwa tamasha la msanii Asake kutoka Nigeria. Kupitia Insta Story yao, Sauti Sol wameeleza shukrani zao kwa mashabiki kwa kujitokeza kwa wingi na kuupa tamasha hilo mvuto mkubwa, wakisema mashabiki walionekana kupendeza na waliufanya tukio hilo kuwa la kubwa zaidi. Tamasha hilo lilifanikiwa kuuza tiketi zote, ambazo zilikuwa zikipatikana kwa bei ya takribani KSh 1,500 na KSh 25,000, hatua iliyoonesha wazi upendo mkubwa kutoka kwa mashabiki wao. Sol Fest 2025 ilianza Desemba 18 na kukamilika Desemba 20, 2025, ikifanyika katika Bustani ya Uhuru, Nairobi. Tamasha hilo lilivutia maelfu ya mashabiki na kuwashirikisha mastaa wa muziki kutoka Kenya akiwemo Bensoul, Nviiri The Storyteller, Khaligraph Jones, Nameless, Jua Cali, Sanaipei Tande, pamoja na wasanii wengine wengi waliotoa burudani kwa siku tatu mfululizo.

Read More
Bien Akanusha Kuvunjika kwa Kundi la Sauti Sol
Robert Elim December 1, 2025
Comments (0)

Bien Akanusha Kuvunjika kwa Kundi la Sauti Sol

Mwanamuziki Bien-Aimé Baraza ameweka wazi msimamo wa kundi la Sauti Sol kufuatia madai yanayoendelea mtandaoni kwamba wamevunja rasmi ushirikiano wao wa muda mrefu. Akizungumza kuhusu tetesi hizo kwenye runinga ya Citizen, Bien amesisitiza kuwa kundi hilo halijawahi kuachana, na kwamba walitangaza tu kuchukua mapumziko ya muda. Kwa mujibu wa Bien, uhusiano kati ya wanachama wa Sauti Sol bado ni mzuri na hakuna mgogoro unaotishia mustakabali wa urafiki wao au kazi yao ya pamoja. Ameeleza kuwa mapumziko hayo yanalenga kuwapa nafasi ya kujikita katika miradi binafsi bila shinikizo, huku wakidumisha utambulisho wao kama kundi. Hata hivyo, Bien amewatoa hofu, akisisitiza kuwa mapumziko hayo si mwisho wa safari yao ya pamoja, bali njia ya kukuza uwezo wao binafsi na kurudi wakiwa na nguvu mpya. Kauli zake zimekuja wakati mashabiki wengine wakitaka ufafanuzi kuhusu hatma ya Sauti Sol, hasa baada ya wanachama wa kundi hilo kuendelea kushughulika zaidi na miradi ya kibinafsi.

Read More
Bien Aweka Historia: Mkenya wa Kwanza Kuujaza Ukumbi wa Indigo at The O2 London
Robert Elim July 20, 2025
Comments (0)

Bien Aweka Historia: Mkenya wa Kwanza Kuujaza Ukumbi wa Indigo at The O2 London

Msanii Bien-Aimé Baraza, mmoja wa waimbaji wa kundi maarufu la Sauti Sol, ameandika historia mpya kwa kuwa msanii wa kwanza kutoka Afrika Mashariki kuuza tiketi zote (sold out) kwa mara ya pili kwenye ukumbi maarufu wa Indigo at The O2, mjini London. Tamasha hilo lililofanyika mwishoni mwa wiki limepongezwa sana na mashabiki wa muziki, si tu kwa umahiri wa Bien jukwaani, bali pia kwa kiwango kikubwa cha mafanikio ya kimataifa anachoendelea kukifikia akiwa msanii wa kujitegemea. Hii ni mara ya pili Bien anajaza ukumbi huo, hatua inayodhihirisha kuwa muziki wake unazidi kuvuka mipaka ya Afrika na kugusa nyoyo za mashabiki duniani kote. Indigo at The O2 ni mojawapo ya majukwaa ya kifahari zaidi nchini Uingereza, na kujaza ukumbi huo si jambo la kawaida kwa wasanii kutoka Afrika Mashariki. Kupitia mitandao ya kijamii, Bien alishukuru mashabiki kwa kumuunga mkono, akisema tukio hilo ni uthibitisho kuwa muziki wa Afrika Mashariki una nafasi kubwa duniani.  “Nimesimama hapa si kwa sababu yangu pekee, bali kwa sababu yenu mashabiki wangu. Tumeandika historia pamoja,” aliandika Bien kwenye Instagram. Wadau wa muziki kutoka Afrika na Diaspora wamesifia mafanikio hayo, wakisema hatua ya Bien inafungua milango kwa wasanii wengine wa Afrika Mashariki kuvuka mipaka ya kikanda na kufikia masoko ya kimataifa. Kwa sasa, Bien anatarajiwa kuendelea na ziara yake ya kimataifa, akitumbuiza katika miji kadhaa barani Ulaya na Marekani huku akiendeleza harakati za kuinua muziki wa Kiafrika kwa ubunifu, ubora na mvuto wa kipekee.

Read More
NACADA Yajibu Bien: “Sio Unafiki Bali Ni Hatua ya Kulinda Afya ya Umma”
Robert Elim July 16, 2025
Comments (0)

NACADA Yajibu Bien: “Sio Unafiki Bali Ni Hatua ya Kulinda Afya ya Umma”

Mamlaka ya Kitaifa ya Kudhibiti Matumizi ya Dawa za Kulevya (NACADA) imejibu vikali matamshi ya msanii Bien wa kundi la Sauti Sol, aliyekosoa pendekezo la kuwapiga marufuku wasanii na watu mashuhuri kutangaza bidhaa za vileo. Kupitia taarifa kwa vyombo vya habari, NACADA imesisitiza kuwa hatua hiyo haifungamani na unafiki wa maadili wala juhudi za kukandamiza uhuru wa wasanii, bali inalenga kulinda afya ya umma hasa vijana, ambao ndio walio katika hatari zaidi ya kushawishika na ulevi kupitia ushawishi wa watu maarufu. Kauli hiyo imekuja siku moja baada ya Bien kusema kuwa hatua hiyo ni unafiki na kwamba wasanii wana haki ya kujipatia kipato kupitia matangazo ya kibiashara. Hata hivyo, NACADA imetoa wito kwa wasanii kutumia ushawishi wao kuhamasisha maisha yenye afya na kutoa matumaini kwa jamii badala ya kushabikia bidhaa zinazoweza kuwa hatari kwa maisha ya wengi.

Read More
Bien Aikosoa Vikali Hatua ya NACADA Kupiga Marufuku Wasanii Kutangaza Pombe
Robert Elim July 14, 2025
Comments (0)

Bien Aikosoa Vikali Hatua ya NACADA Kupiga Marufuku Wasanii Kutangaza Pombe

Msanii nyota wa Kenya na mwanachama wa kundi la Sauti Sol, Bien-Aimé Baraza, ameikosoa vikali Mamlaka ya Kitaifa ya Kudhibiti Matumizi ya Pombe na Dawa za Kulevya (NACADA) kwa pendekezo la kuzuia watu mashuhuri kushiriki kwenye matangazo ya bidhaa za pombe. Kupitia ujumbe mzito alioutuma kwenye ukurasa wake wa Instagram, Bien amesema hatua hiyo ni ya kinafiki na inadhuru moja kwa moja sekta ya sanaa, ubunifu na maudhui, inayotegemewa na maelfu ya vijana kwa ajira. “Hii ni unafiki. Mnajifanya kuwajali vijana huku mnaua ndoto zao. Mnashangaa kwa nini ukosefu wa ajira ni mkubwa? Mnaua kila nafasi tunayopata,” aliandika Bien. Bien amesisitiza kuwa badala ya kuweka marufuku inayowakandamiza vijana, serikali inapaswa kuja na sera bora zinazolinda afya ya umma bila kuathiri vipato vya watu wanaotegemea sekta hizo.  “Je, sisi ndio nchi ya kwanza kuwa na matatizo kama haya? Mbona tuendelee kujifanya watakatifu kuliko wengine wakati hatutoi suluhisho mbadala?” aliongeza Bien kwa ukali. Kauli yake imezua mjadala mitandaoni, wengi wakimtetea na kuitaka serikali kuweka sera zenye kuzingatia uhalisia wa kiuchumi.

Read More
Bien wa Sauti Sol Aibuka na Kuku Hai Katika Show ya DJ AG London
Robert Elim July 9, 2025
Comments (0)

Bien wa Sauti Sol Aibuka na Kuku Hai Katika Show ya DJ AG London

Msanii mashuhuri wa kundi la Sauti Sol, Bien-Aimé Baraza, ameibua mshangao na vicheko mitandaoni baada ya kuonekana akitumbuiza katika onyesho la mtaa la DJ AG maarufu jijini London huku akibeba kuku hai mikononi. Tukio hilo lilifanyika katika eneo la King’s Cross, ambapo DJ AG huandaa matukio ya kipekee ya muziki ya mtaani, yanayopata sifa kwa ubunifu na mvuto wake wa kipekee. Bien sasa amejiunga rasmi na orodha ya watu maarufu waliowahi kushiriki au kuonekana kwenye onesho hilo, akiwemo Ed Sheeran, Will Smith, Rita Ora, Flavour, Demarco, na hivi karibuni Diamond Platnumz. Katika video iliyosambaa kwa kasi kwenye mitandao ya kijamii, Bien alionekana akicheza kwa hisia na kuimba huku akiwa amembeba kuku – jambo lililowafanya mashabiki washangae, wengine wakicheka, wakitafsiri tukio hilo kama mvuto wa Kiafrika iliyoongeza ladha ya kipekee kwenye burudani hiyo. DJ AG, anayejulikana kwa kuandaa street sets zinazolenga kuonyesha vipaji vya wasanii maarufu pamoja na wachanga, ameendelea kuvutia macho ya dunia kwa namna anavyounganisha muziki, mitandao ya kijamii na utamaduni wa mitaani. Onyesho hilo limeibuka kuwa jukwaa wazi la ubunifu na maonyesho yasiyo na mipaka. Mashabiki wa Bien na kundi la Sauti Sol wamepongeza kitendo hicho kama ishara ya ubunifu wa hali ya juu na utangazaji wa utamaduni wa Kiafrika katikati ya jiji la London. “Bien ni msanii anayeweza kuwasiliana na hisia za watu, na pia ana kipaji cha kuleta vichekesho. Hii ya kuku imeweka historia nyingine kabisa!” aliandika shabiki mmoja kwenye X (zamani Twitter). Kwa sasa, mashabiki wanasubiri kwa hamu kuona ni nani mwingine maarufu atakayejiunga na DJ AG katika street shows zake zijazo

Read More
Bien Ajitetea Baada ya Kauli Tatanishi Kuhusu Wanawake wa Kenya
Robert Elim June 10, 2025
Comments (0)

Bien Ajitetea Baada ya Kauli Tatanishi Kuhusu Wanawake wa Kenya

Mwanamuziki maarufu kutoka Kenya na mshiriki wa kundi la Sauti Sol, Bien-Aimé Baraza, amevunja ukimya kufuatia mjadala ulioibuka mitandaoni kuhusu mstari wa wimbo wake mpya unaozungumzia wanawake wa Kenya kuwa na foreheads kubwa (paji kubwa za uso). Kupitia mtandao wa kijamii wa Instagram, Bien alisisitiza kuwa wimbo wake ni kazi ya sanaa inayopaswa kuchukuliwa kwa upana na si kwa hisia binafsi Bien aliongeza kuwa kauli yake haikuwa ya matusi bali ya mapenzi na shukrani kwa wanawake wa Kiafrika, hasa mke wake, Chiki Kuruka, ambaye ni mhamasishaji wa mazoezi ya mwili na mpenda sanaa.  “I love our women with foreheads. I could never be with a woman who doesn’t have a forehead. Have you seen my wife?” Aliandika akimjibu shabiki aliyemkosoa vikali kuhusu wimbo wake mpya unaotajwa kuwa na mistari ya kuudhi, hasa kwa wanawake wa Kenya.. Kauli yake imeibua maoni mbalimbali mitandaoni. Wapo waliomsifu kwa kuwa na ujasiri wa kusimama na kazi yake, huku wakiona mstari huo kama ucheshi wa kawaida, lakini pia wapo waliodai kuwa wasanii wanapaswa kuwa makini zaidi na lugha wanayotumia kwa kuwa wana ushawishi mkubwa kwa jamii. Bien wa Sauti Sol na Diamond Platnumz wameachia wimbo mpya unaoitwa “Katam”. Wimbo huu umetoka hivi karibuni na umepokelewa vizuri sana na mashabiki wao. “Katam” ni wimbo wa mapenzi unaosherehekea uzuri na umoja barani Afrika, na unawaunganisha wasanii hawa wawili wakubwa wa Afrika Mashariki.

Read More
Bien Aime Afafanua Msimamo Wake Kuhusu Ndoa ya Wake Wengi
Robert Elim May 29, 2025
Comments (0)

Bien Aime Afafanua Msimamo Wake Kuhusu Ndoa ya Wake Wengi

Mwanamuziki maarufu wa kundi la Sauti Sol, Bien Aime Baraza, amefunguka kuhusu msimamo wake kuhusu ndoa za wake wengi, akisema hana mpango wa kuoa zaidi ya mke mmoja. Akihojiwa kwenye kipindi cha The Breakfast Club, Bien alieleza kuwa licha ya kukulia kwenye familia ya wake wengi, yeye ana mtazamo tofauti. “Ninatoka katika familia ya wake wengi, baba yangu ana watoto kumi kutoka kwa wanawake sita tofauti. Mimi ndiye wa mwisho kati ya hao kumi,” alisema Bien. Bien alisema uzoefu huo wa kifamilia umemfundisha mengi kuhusu mahusiano, na ndio maana amejiwekea msimamo wa kutotaka kuoa wake wengi. Mbali na hayo, Bien pia alisimulia changamoto alizopitia alipokuwa akitafuta kuku hai kwa ajili ya kipindi cha On The Radar kilichorekodiwa New York. Kwa mujibu wa msanii huyo, sheria kali za wanyama katika jiji hilo zilimuweka kwenye wakati mgumu, kwani wauzaji wengi walikataa kumuuzia kuku huyo.  “Nililazimika kuendesha gari kwa zaidi ya saa moja hadi Pennsylvania ili kupata kuku hai. New York ni ngumu sana kwa hilo,” alisema Bien. Kauli hizo zimeendelea kumweka Bien katika uangalizi wa vyombo vya habari, huku mashabiki wakifurahia uwazi wake na uhalisia wa maisha anayoshiriki.

Read More
Msanii Bien Atikisa Marekani, Aipa Heshima Kenya Katika The Breakfast Club
Robert Elim May 27, 2025
Comments (0)

Msanii Bien Atikisa Marekani, Aipa Heshima Kenya Katika The Breakfast Club

Msanii mashuhuri wa Kenya, Bien Aime Baraza, ameweka historia kwa kuwa msanii wa kwanza kutoka Kenya na Afrika Mashariki kwa ujumla kuhojiwa katika kipindi maarufu cha The Breakfast Club nchini Marekani. Hatua hii imepokelewa kwa shangwe kubwa na mashabiki wa muziki barani Afrika, ikionekana kama mafanikio makubwa kwa muziki wa ukanda huu. Katika mahojiano hayo ya kipekee, Bien alifunguka kuhusu maisha yake ya kifamilia, akisisitiza umuhimu wa uwazi katika ndoa yake. Mkali huyo wa bendi ya Sauti Sol, alionyesha kuwa uaminifu na ushirikiano ndio msingi wa mafanikio yao ya kindoa. “Kwenye nyumba yangu, pesa ni za familia. Mke wangu ana ufikiaji wa pesa zangu zote nami pia nina ufikiaji wa pesa zake zote,” alisema Bien kwa uwazi, Mbali na maisha ya nyumbani, Bien pia aligusia muziki wa Kenya na alitoa heshima kwa vipaji vya hapa nyumbani kwa kueleza wasanii anaowakubali zaidi. “Wasanii ninaowapenda sana Kenya ni Nyashinski, Ywaya kutoka kundi la Watendawili, Kodong Klan na Njerae,” alieleza Bien, Hatua yake ya kuonekana kwenye The Breakfast Club inachukuliwa kama ushindi mkubwa kwa muziki wa Afrika Mashariki na imezidi kuonyesha kuwa wasanii kutoka ukanda huu wana nafasi kubwa kwenye jukwaa la kimataifa. Mashabiki mitandaoni wameonyesha fahari na pongezi, wakimpongeza Bien kwa kulipeperusha vyema bendera ya Kenya kimataifa.

Read More
Shabiki Aweka Historia Kwenye Tamasha la Bien New York kwa Pendekezo la Ndoa la Kushtukiza
Robert Elim May 21, 2025
Comments (0)

Shabiki Aweka Historia Kwenye Tamasha la Bien New York kwa Pendekezo la Ndoa la Kushtukiza

Tamasha la Bien jijini New York liligeuka kuwa jukwaa la mapenzi na mshangao, pale ambapo shabiki mmoja aliwashangaza wote kwa kutoa pendekezo la ndoa mbele ya umati mkubwa wa mashabiki waliofurika kwenye ukumbi huo uliojaa hadi pomoni. Bien, mwanamuziki mahiri kutoka Kenya na mwanachama wa kundi maarufu la Sauti Sol, alikuwa akitumbuiza kwa hisia moja ya nyimbo zake za mahaba, alipokatizwa kwa heshima na shabiki huyo aliyepanda jukwaani akiwa ameambatana na mchumba wake. Kwa msaada wa timu ya Bien, alipanda jukwaani na kutangaza upendo wake hadharani kwa kutoa pendekezo la ndoa mbele ya mashabiki wote. Mashabiki walilipuka kwa shangwe na vigelegele wakati mwanamke huyo alikubali pendekezo hilo huku machozi ya furaha yakitiririka. Bien, alionekana kuguswa na tukio hilo la kipekee. “Hii ndiyo maana ya muziki – kuunganisha watu, kuleta mapenzi na kumbukumbu zisizosahaulika. Hongera kwa wapenzi wetu wapya!” alisema Bien Pendekezo hilo limekuwa gumzo mitandaoni, likipokelewa kwa furaha na msisimko na mashabiki kutoka kila kona ya dunia. Wengi wameelezea tukio hilo kama moja ya matukio ya kipekee kuwahi kutokea katika tamasha la muziki, na ushahidi kuwa muziki wa Bien si tu wa kusikiliza bali pia wa kuishi. Tamasha hilo lilikuwa sehemu ya ziara ya kimataifa ya Bien kama msanii wa kujitegemea, na sasa linaacha kumbukumbu si tu kwa sababu ya muziki mzuri, bali pia kwa kuwa sehemu ya safari ya mapenzi ya watu wawili.

Read More
Bien Aandika Historia The Radar Radio, Awasilisha Utambulisho wa Mkenya kwa Ubunifu
Robert Elim May 17, 2025
Comments (0)

Bien Aandika Historia The Radar Radio, Awasilisha Utambulisho wa Mkenya kwa Ubunifu

Msanii maarufu kutoka Kenya na mmoja wa wanamuziki wa kundi la Sauti Sol, Bien-Aimé Baraza, ameweka historia mpya kwa kuwakilisha Kenya na Afrika Mashariki kwenye kipindi maarufu cha The Radar Radio nchini Uingereza. Hii ni baada ya kuonekana kwenye kipindi hicho kwa freestyle ya kipekee, akifuatia nyayo za msanii Kaycyy, ambaye alikuwa msanii wa kwanza kutoka Afrika Mashariki kushiriki. Kilichoifanya freestyle ya Bien kuwa ya kipekee si tu uwezo wake wa kutunga na kuwasilisha kwa ustadi, bali pia hatua yake ya kuleta kuku hai studio kama ishara ya utamaduni wake wa Kiluhya na mzizi wake wa Kiafrika. Hatua hiyo imetafsiriwa kama tamko la fahari ya utambulisho wake wa asili, na imepokelewa kwa hisia tofauti mitandaoni. The Radar Radio ni jukwaa maarufu duniani ambalo limewahi kuwakaribisha wasanii wakubwa kama Drake, Central Cee, Ice Spice na wengine wengi, likiwa ni sehemu ya kuonesha vipaji halisi kupitia maonyesho ya freestyle. Kwa Bien, huu ulikuwa wakati wa kuonesha kuwa muziki wa Afrika Mashariki unaweza kusimama bega kwa bega na muziki wa kimataifa, huku ukidumisha mizizi ya kitamaduni. Hatua yake imepongezwa sana na mashabiki barani Afrika na diaspora, wengi wakisema kuwa ni mfano bora wa jinsi wasanii wa Kiafrika wanavyoweza kutumia jukwaa la kimataifa kueneza utamaduni wao kwa njia ya ubunifu. Bien kwa sasa anaendelea na kazi yake ya muziki kama msanii wa kujitegemea baada ya mafanikio makubwa akiwa na Sauti Sol. Uwepo wake kwenye The Radar ni hatua nyingine kubwa katika safari yake ya kimataifa.

Read More
Bien wa Sauti Sol ahirisha ziara yake ya muziki nchini Marekani
Robert Elim February 2, 2025
Comments (0)

Bien wa Sauti Sol ahirisha ziara yake ya muziki nchini Marekani

Mwimbaji maarufu nchini Kenya anayeunda kundi la Sauti Sol, Bien Aime Baraza ametangaza kuahirisha ziara yake ya muziki nchini Marekani Kwa mujibu wa taarifa iliyotolewa na Duke Concept Entertainment kupitia ukurasa wao rasmi wa Instagram, maamuzi hayo yametokana na kukosekana kwa baadhi ya wanachama muhimu wa bendi ambao kwa mujibu wao ingeathiri mchakato mzima wa kutoa burudani kwa mashabiki. Pamoja na kuahirisha ziara hiyo Bien amewaomba radhi mashabiki zake kwa usumbufu uliojitokeza huku akiwajuza walionunua tiketi kuwa wasiwe na hofu kwani tiketi hizo zitatumika pale watakapotangaza tena kufanyika kwa shows hizo hivi karibuni. Bien alipaswa kuanza ziara yake hiyo ya “Alusa Why Are You Topless” mnamo tarehe 5 mwezi Februari mwaka huu ambapo angeanzia huko Atalanta na kuihitimisha Februari 16 Jijini New York.

Read More