Tusker FC yashinda 2-0 dhidi ya Bidco United kombe la Mozzart
Robert Elim March 6, 2026
Comments (0)

Tusker FC yashinda 2-0 dhidi ya Bidco United kombe la Mozzart

 Mabingwa wa zamani wa Ligi Kuu ya Kenya, Tusker FC, wameendeleza wimbi lao la ushindi baada ya kuibwaga Bidco United mabao 2-0 katika mchuano mkali wa awamu ya 32 ya Kombe la Mozzart Bet uliopigwa leo katika uwanja wa Police Sacco. Tusker FC ilianza mchezo huo kwa kasi, ikitawala safu ya kiungo na kutengeneza nafasi nyingi za hatari. Jitihada hizo zilijibu mapema katika kipindi cha kwanza pale mshambuliaji Bless Bakai alipotikisa nyavu na kuwapatia Wana Tusker bao la uongozi. Licha ya Bidco United kujaribu kurudi mchezoni, Tusker ilipigilia msumari wa mwisho kupitia kwa Stephen Etyang, aliyefunga bao la pili na kuhakikisha timu yake inasonga mbele kwa kishindo. Ushindi huu unaongeza matumaini ya Tusker kutwaa taji msimu huu, huku Bidco wakisalia katikati ya jedwali baada ya kushindwa kupata hata bao la kufuta machozi. Mechi za kombe hilo la Mozzartbet zitaendelea mwishoni mwa wikendi hii huku Shabana wakiwa nyumbani dhidi ya Muhoroni FC katika pambano ambalo linatarajiwa kuwa kali zaidi. KCB watakuwa Embu kuchuana na Zetech Titans ilihali Polisi FC itakuwa katika uwanja wa Zoonzi Kesuli kukutana na Police FC katika uwanja wa Zoonzi TBM  Kemuri. Bandari itaikaribisha Bombani stars huko Kwale.

Read More
KPL: Sofapaka Yatandika Tusker 7–1, Yatibua Mbio za Ubingwa
Robert Elim May 18, 2025
Comments (0)

KPL: Sofapaka Yatandika Tusker 7–1, Yatibua Mbio za Ubingwa

Ligi Kuu ya Soka nchini Kenya iliendelea leo Jumapili kwa mechi kadhaa muhimu zilizopigwa katika viwanja tofauti kote nchini. Timu zilipambana kuimarisha nafasi zao kwenye msimamo wa ligi huku msimu ukikaribia ukingoni. Kariobangi Sharks walipoteza pointi tatu muhimu baada ya kuchapwa mabao mawili kwa bila na Kakamega Homeboyz. Ushindi huo umeiwezesha Homeboyz kufikisha pointi 54 na kupanda hadi nafasi ya tano kwenye msimamo wa ligi. Nairobi City Stars walitoka sare ya bao moja kwa moja dhidi ya Posta Rangers. City Stars sasa wanasalia katika nafasi ya 17, hali inayowatia wasiwasi mkubwa wa kushuka daraja ikiwa matokeo yao hayataboreka katika mechi zijazo. Shabana walilazwa bao moja kwa sifuri na Mara Sugar, katika mechi iliyochezwa mjini Kisii. Ushindi huo umeisaidia Mara Sugar kupanda hadi nafasi ya 15, wakijinasua kutoka eneo la hatari kwa sasa. Katika mechi nyingine, Gor Mahia walitoshana nguvu na Murang’a SEAL kwa sare tasa. Gor Mahia sasa wanashikilia nafasi ya tatu kwa pointi 54, wakizidiwa na Tusker FC kwa alama moja na viongozi wa ligi Kenya Police kwa pointi saba. Bandari na AFC Leopards walitoka sare ya bila kufungana. AFC Leopards sasa wako nafasi ya sita wakiwa na pointi 46, huku Bandari wakisalia katikati ya jedwali kwa pointi 42. Kenya Police waliendelea na kampeni yao ya kutwaa taji la ligi baada ya kuibuka na ushindi wa bao moja kwa bila dhidi ya FC Talanta. Ushindi huo umeimarisha uongozi wao kwa pointi 61, wakisalia kileleni mwa msimamo. Katika mechi ya mwisho ya siku, Sofapaka waliwashangaza mashabiki kwa kuicharaza Tusker FC mabao saba kwa moja katika ushindi wa kuvutia zaidi wa siku. Ushindi huo si tu umewainua kutoka nafasi za chini, bali pia umevuruga nafasi ya Tusker FC kwenye mbio za ubingwa. Kenya Police wanaendelea kuongoza ligi kwa pointi 61, wakifuatiwa na Tusker FC walio na 55, licha ya kipigo kizito walichopokea. Gor Mahia wanakamata nafasi ya tatu kwa pointi 54. Kakamega Homeboyz na AFC Leopards wanafuatia. Mkiani mwa msimamo bado ni Bidco United, walio na alama 29 na wakiwa katika hatari kubwa ya kushuka daraja. Huku msimu ukielekea ukingoni, kila mechi ina uzito wake. Mashabiki wanaendelea kushuhudia msimu wa kusisimua wa soka la nyumbani, ambapo kila bao linaweza kuamua hatima ya timu.

Read More
FC Talanta Yaizima Tusker FC, Mbio za Ubingwa zapata Pigo
Robert Elim May 15, 2025
Comments (0)

FC Talanta Yaizima Tusker FC, Mbio za Ubingwa zapata Pigo

Mechi saba za Ligi Kuu ya Soka Nchini Kenya zilipigwa hapo jana na kuleta mabadiliko muhimu kwenye msimamo wa ligi. Ulinzi Stars walilazimishwa sare ya bao moja kwa moja dhidi ya Posta Rangers katika uwanja wa Ulinzi Complex. Tusker FC wakajikuta pabaya walipopoteza mabao mawili kwa bila mikononi mwa FC Talanta, matokeo yanayowapunguzia kasi kwenye mbio za ubingwa. Kakamega Homeboyz waliibuka na ushindi wa mabao 2 kwa 1 dhidi ya Kenya Police FC katika uwanja wa Bukhungu, huku Shabana FC wakiwafunga Bidco United kwa mabao kama hayo kwenye uwanja wa Gusii. Mara Sugar na Bandari FC walitoshana nguvu kwa sare tasa, huku Murang’a SEAL wakipata ushindi wa mabao 2 kwa 0 dhidi ya Sofapaka. Na katika uwanja wa Nyayo, AFC Leopards waliwashusha Mathare United kwa mabao 3 kwa 1. Leo, Alhamisi, Kariobangi Sharks watakuwa nyumbani dhidi ya KCB katika uwanja wa Kasarani, huku Gor Mahia wakipambana na Nairobi City Stars kwenye uwanja wa Nyayo. Mechi hizi mbili zinatarajiwa kuathiri mwelekeo wa msimamo wa ligi kadri msimu unavyoelekea ukingoni

Read More