Tag: willy paul

Staa wa muziki kutoka Kenya, Willy Paul, amethibitisha kuwa duka lake la pombe lilivamiwa usiku wa kuamkia leo na kundi la watu waliodaiwa kukodiwa, ambao waliiba vinywaji vya bei ghali na kuharibu mali nyingi. Kupitia taarifa aliyoitoa kwenye mitandao ya kijamii, Willy Paul amesema wavamizi hao walijaribu kuonesha kana kwamba tukio hilo lilitekelezwa na wanafunzi, ilhali lengo lao kuu lilikuwa ni wizi. Amesema wavamizi hao walivunja madirisha, wakaingia dukani, wakaiba pombe za bei ghali na hata kujaribu kuondoa CCTV hard drive ili kuficha ushahidi, lakini walishindwa. Msanii huyo alieleza kuwa wahalifu hao waliharibu mali nyingi ikiwemo gari lake, lakini hakuna mtu aliyejeruhiwa katika tukio hilo. Amesema wanashirikiana kwa karibu napolisi ili kuhakikisha wahusika wanakamatwa na kufikishwa mbele ya sheria. Licha ya tukio hilo, hitmaker huyo wa “Ngunga” amewahakikishia mashabiki wake na wateja kwamba biashara yake inaendelea kama kawaida na amewashukuru wote kwa kuendelea kumuunga mkono katika kipindi hiki kigumu.

Msanii wa muziki wa Kenya, Willy Paul, amefunguka hadharani baada ya kukosolewa na baadhi ya mashabiki kwa kujihusisha na kiki au kuvutia umaarufu kabla ya kuachia kazi zake mpya. Kupitia Insta Story, Willy Paul ameeleza kuwa tabia hiyo ya kudhaniwa kuwa anafuata umaarufu ni sehemu ya mitazamo potofu ya baadhi ya mashabiki, na kwamba lengo lake ni kushirikiana na mashabiki wake na kuhakikisha nyimbo zake zinawafikia watu wengi. Mkali huyo wa Toto, ameongeza kuwa kutumia mitandao ya kijamii kuendesha mijadala au kuunganisha mashabiki siyo kutafuta kiki au clout bali ni mbinu ya kisasa ya kukuza muziki. Aidha, msanii huyo amesema kuwa kwa muda mrefu amekuwa akijitahidi kuunda uhusiano wa karibu na wapenzi wa muziki wake, huku akisisitiza kuwa kila hatua ya matangazo ya nyimbo yake ni kwa lengo la kushirikisha mashabiki na si kwa kujihusisha na umaarufu bandia. Kauli yake imekuja mara baada ya kushtumiwa na VJ Patelo kwa kukaidi makubaliano ya malipo baada ya video shoot, madai yaliyowafanya mashabiki kuhisi alitengeneza mazingira ya kuzungumziwa mtandaoni kabla ya kuachia wimbo wake mpya Ijumaa wiki hii.

Msanii wa Kenya, Willy Paul, ameibua maswali kuhusu uteuzi wa wasanii waliopangwa kutumbuiza katika fainali ya Mashindano ya CHAN 2024 yatakayofanyika leo Jumamosi katika uwanja wa Kasarani ambapo Morocco itachuana na Madagascar. Kupitia Instastory,Willy Paul ameonekana kutoridhishwa na uteuzi huo, akidokeza kuwa waandaaji huenda walipuuzia nafasi ya kuhusisha wasanii wengine wa Kenya ambao wangeweza kupeperusha bendera ya taifa ipasavyo kwenye tukio hilo kubwa. Kauli ya Willy Paul sasa imechochea mjadala mitandaoni kuhusu nafasi ya wasanii wa Kenya katika matukio ya kimataifa, huku baadhi ya mashabiki wakihisi kuwa nchi inapaswa kupewa nafasi kubwa zaidi kupitia muziki wake kwenye majukwaa ya aina hii. Hayo yote yaliibuka muda mfupi baada ya waandaaji wa mashindano hayo kutangaza kuwa Savara wa Sauti Sol, nyota wa Tanzania Zuchu, na mshindi wa tuzo za kimataifa kutoka Uganda Eddy Kenzo, sio tu watatumbuiza siku ya fainali, bali pia wameandaa na kuimba anthem rasmi ya CHAN 2024.

Msanii wa muziki nchini Kenya, Willy Paul, ameibua mjadala mtandaoni baada ya kujitokeza kama mshauri nasaha kwa wanaume, akiwataka kuweka kipaumbele maendeleo yao binafsi badala ya kutumia muda mwingi kuwafuata wanawake. Kupitia ukurasa wake wa Instagram, Willy Paul aliwahimiza wanaume kuelekeza nguvu na muda wao katika kutafuta fedha na kujijenga kimaisha. Alisisitiza kuwa tabia ya kuwabembeleza wanawake kupita kiasi inaweza kuwapotezea muda muhimu na kuwazuia kufanikisha malengo yao ya maisha. Kauli hiyo imezua maoni mseto miongoni mwa mashabiki, hasa ikizingatiwa kuwa inakuja siku moja tu baada ya kumshauri msanii mwenzake, Okello Max, ajikite zaidi katika kazi yake ya muziki. Alionya kuwa mienendo hiyo inaweza kuhatarisha mustakabali wa taaluma yake. Willy Paul, anayejulikana kwa mitazamo yake yenye utata, ameendelea kutumia mitandao ya kijamii kama jukwaa la kutoa ushauri na maoni kuhusu masuala ya kijamii na maisha ya vijana.

Msanii maarufu wa muziki wa Kenya, Willy Paul, ametangaza kuwa kwa sasa yuko katika harakati za kutafuta eneo bora la kupigia video ya wimbo wake mpya. Kupitia mitandao ya kijamii, mwanamuziki huyo alisema kuwa ana mipango mikubwa ya kuhakikisha video hiyo inakuwa ya kiwango cha juu, na hivyo anahitaji mandhari ya kuvutia itakayoendana na ubora wa kazi yake. “Natafuta location kali ya kushoot music video. Mnaweza nisaidia na ideas?” aliandika Willy Paul. Mashabiki wake wamejitokeza kwa wingi na kutoa mapendekezo tofauti, baadhi wakimtajia maeneo kama: Ngong Hills, The Alchemist, Westlands, Karura Forest, Watamu au Diani Beach na Nairobi Railway Museum. Willy Paul, ambaye hivi majuzi amekuwa akizua gumzo kutokana na mabadiliko ya kimuziki na mitindo, anaonekana kutaka kupeleka ubunifu wake kwenye kiwango kingine. Wimbo huu mpya unatarajiwa kuwa sehemu ya mradi mkubwa anaotarajia kuuzindua kabla ya mwisho wa mwaka. Mashabiki wanasubiri kwa hamu kuona ni eneo gani atakalochagua na iwapo video hiyo itavunja rekodi kama kazi zake za awali