Kampuni ya WhatsApp imeanza rasmi kuonyesha matangazo duniani kote kupitia huduma zake za Status Ads na Channels, katika hatua mpya ya kuruhusu biashara kufikia watumiaji moja kwa moja ndani ya programu hiyo maarufu ya mawasiliano.
Kupitia mfumo huo mpya, matangazo yataonekana kwenye sehemu ya Status, sawa na hadithi za muda mfupi, pamoja na ndani ya Channels ambazo watumiaji hufuata kwa ajili ya kupata taarifa na maudhui mbalimbali.
Hata hivyo, WhatsApp imesisitiza kuwa matangazo hayo hayataingia kwenye mazungumzo binafsi, wala hayataonekana katika sehemu kuu ya Messages. Kampuni hiyo imeeleza kuwa faragha ya watumiaji itaendelea kulindwa kama kawaida.
Hatua hii ni sehemu ya mkakati wa kampuni mama, Meta Platforms, wa kuongeza mapato kupitia majukwaa yake ya kidijitali, huku ikiendelea kudumisha usalama wa taarifa za watumiaji.
Kwa mujibu wa taarifa zilizotolewa, ujumbe binafsi utaendelea kulindwa kwa teknolojia ya end-to-end encryption, na maudhui ya mazungumzo hayatatumika katika kulenga matangazo.
