Tag: Pipi Jojo

Msanii wa muziki wa Bongoflava, Pipi Jojo, ameweka wazi sababu iliyomfanya kuachana na meneja wake wa zamani, Chief Godlove, akisema kuwa kuendelea kufanya kazi pamoja kungemlazimu kupoteza moja kati ya mambo mawili muhimu maishani mwake. Akizungumza baada ya kutemana na meneja huyo ambaye kwa muda mrefu amekuwa akisimamia masuala ya muziki wake, Pipi Jojo amesema kuwa hali iliyokuwa ikijitokeza ingemweka katika nafasi ngumu ya kuchagua kati ya kuendeleza taaluma yake ya muziki au kulinda mahusiano yake ya kifamilia. Kwa mujibu wa msanii huyo, aliona ni busara kuchukua hatua mapema ili kuepuka athari ambazo zingeharibu mustakabali wake binafsi na wa kikazi. Hata hivyo, Pipi Jojo ambaye alikuwa akipiga stori na Clouds FM, hakuweka wazi kwa undani kile kilichosababisha mgogoro huo, bali amesisitiza kuwa uamuzi huo ulilenga kulinda maisha yake ya baadaye pamoja na uhusiano wake na familia.

Msanii wa muziki, Pipi Jojo, ameanzisha akaunti mpya ya YouTube kufuatia mzozo na aliyekuwa bosi wake, Chief Godlove ambaye alimnyang’anya chaneli yake awali iliyokuwa na wafuasi zaidi ya laki moja baada ya kutofautiana kuhusu masuala ya mkataba. Kupitia mitandao ya kijamii, Pipi Jojo amewaomba mashabiki wake kujiunga na chaneli yake mpya kwa kusubscribe, huku akiwahakikishia kuwa ataendelea kutoa kazi bora na za kuvutia. Hatua hii imekuja baada ya kuvunjika kwa ushirikiano wake na Chief Godlove, ambaye alitaka amsainishe kwenye mkataba wa miaka 10, jambo ambalo Jojo alilikataa. Mvutano huo umesababisha Pipi Jojo kupoteza chaneli yake ya zamani, lakini sasa ameanza upya na matarajio mapya. Mashabiki wake wanahimizwa kuunga mkono safari yake mpya ya muziki kupitia chaneli hiyo, huku tukio hili likionekana kama mwanzo wa ukurasa mpya katika maisha yake ya kisanii.

Msanii wa Bongo Fleva, Pipi Jojo, ametoa shukrani zake za dhati kwa mashabiki wote waliomuunga mkono tangu aanze safari yake ya muziki hadi kufikia hatua ya kuachia EP yake I Want to Make My Mama Proud. Akizungumza akiwa kwenye ziara yake ya kimuziki nchini Uganda, Pipi Jojo amesema upendo na sapoti kutoka kwa mashabiki imekuwa chachu kubwa ya mafanikio yake. Msanii huyo pia ametumia fursa hiyo kuweka wazi mipango yake mikubwa ya mwaka 2026, akieleza kuwa analenga kufanya kolabo na wasanii wa Uganda kama sehemu ya juhudi za kuupeleka muziki wa Bongo Fleva katika jukwaa la kimataifa. Pipi Jojo, ambaye kwa sasa yupo chini ya usimamizi wa baba yake Chief Godlove, anaendelea kufanya vizuri kwenye soko la muziki kupitia wimbo wake mpya “With You”, aliowashirikisha Chid Benz na Country Wizzy, wimbo unaoendelea kupata mapokezi makubwa kutoka kwa mashabiki wa muziki wa Afrika Mashariki.

Msanii chipukizi kutoka Tanzania, Pipi Jojo, amefichua mipango yake ya kuanza ziara ya kimuziki nchini Uganda kwa ajili ya kutangaza EP yake mpya iitwayo “I Want My Mama Proud.” Kupitia ukurasa wake wa Instagram, Pipi Jojo ameonekana akizungumza kwa simu na baba yake, Chief Godlove, akimuomba magari manne kwa ajili ya kufanikisha media tour hiyo pamoja na kuandaa dance challenge ya wimbo wake “Chakacha”, ambao video yake ina zaidi ya views milioni moja ndani ya muda mfupi. Katika mazungumzo hayo yaliyovutia mashabiki, Pipi Jojo ameonekana akideka huku baba yake akimhakikishia kumpatia magari manne ya kifahari pamoja na fedha za kutosha kufanikisha ziara hiyo, ingawa alikiri alitamani kumkodishia ndege binafsi (private jet). Billionea Chief Godlove, amemsifu binti yake kwa juhudi na nidhamu anayozionyesha katika kazi yake ya muziki, akitabiri kuwa huenda akawa msanii wa kwanza kuipatia Tanzania tuzo ya Grammy. Kwa sasa, Pipi Jojo yupo katika hatua za mwisho kukamilisha ziara yake nchini Kenya, ambayo imechangia kwa kiasi kikubwa kumjenga kimataifa na kumletea mashabiki wapya kutoka mataifa mbalimbali.

Msanii chipukizi wa Bongofleva Pipi Jojo ameachia rasmi EP yake mpya inayojulikana kwa jina “I Want To Make My Mama Proud”, kazi ambayo inajumuisha ngoma tano alizozifanya bila kumshirikisha msanii yeyote. EP hiyo inajumuisha nyimbo kama “Chakacha,” “With You,” “Nakupenda,” “Waite,” na “Sunrise.” Kila wimbo una ladha yake ya kipekee, ikionesha ukuaji wa kimuziki na ubunifu wa msanii huyo anayejitengenezea jina kwenye muziki wa kizazi kipya. Kwa mujibu wa Pipi Jojo, mradi huu ni wa kipekee kwani umetokana na ndoto yake ya kumfanya mama yake ajivunie mafanikio yake ya muziki kutokana na maisha magumu aliyokulia. EP “I Want My Mama Proud” inapatikana kwenye majukwaa yote ya muziki mtandaoni, ikiwemo Spotify, Boomplay, na Apple Music. Pipi Jojo ni msanii aliyeibuliwa na Chief God Love, ambaye amemkabidhi prodyuza Mr. T Touch jukumu la kumsimamia kisanaa ili kuhakikisha kipaji chake kinanawiri na kufika mbali zaidi.

Msanii chipukizi anayekuja kwa kasi, Pipi Jojo, ametangaza kuwa ataachia rasmi EP yake mpya Oktoba 9 kwenye majukwaa yote ya kidigitali. Kupitia ujumbe wake, Pipi Jojo ameeleza kuwa alipata nafasi ya kukutana na Chief Godlove Billionaire kwa ajili ya kumsikilizisha kazi zake, ambapo kwa bahati nzuri alikutana pia na gwiji wa muziki wa HipHop nchini Tanzania, Chid Benz. Amesema kuwa kukutana na Chid Benz kumekuwa ni heshima kubwa kwake, kwani mbali na kupata ushauri wa kitaalamu, hakutarajia kuwa msanii mkongwe wa hadhi hiyo angekubali na kubariki kazi zake. Kwa mujibu wa Pipi Jojo, wawili hao walimsikiliza kwa makini na kumpa baraka ya kuachia rasmi kazi zake, jambo ambalo amelitaja kuwa ni hatua muhimu katika safari yake ya muziki. Ameomba mashabiki, vyombo vya habari na wadau mbalimbali wa muziki kumpa sapoti ili EP yake ipokelewe vyema sokoni na kumsaidia kusonga mbele katika ndoto yake ya kuwa miongoni mwa wasanii wakubwa nchini Tanzania.