Kampuni ya WhatsApp imezindua rasmi huduma ya kupiga simu za sauti na video kupitia tovuti yake ya WhatsApp Web, ikiwa ni hatua mpya ya kuboresha mawasiliano kwa watumiaji wa kompyuta.
Kupitia huduma hiyo mpya, watumiaji sasa wanaweza kupiga na kupokea simu moja kwa moja ndani ya kivinjari bila kulazimika kupakua au kusakinisha programu ya WhatsApp Desktop kama ilivyokuwa hapo awali.
Kwa mujibu wa maboresho hayo, huduma inaruhusu upigaji wa simu za sauti kwa mtu mmoja mmoja pamoja na simu za video, ikiwemo mawasiliano ya vikundi. Hatua hii inalenga kuongeza urahisi na ufanisi, hususan kwa watumiaji wanaotumia WhatsApp katika mazingira ya kikazi au kielimu.
Ili kutumia huduma hiyo, mtumiaji anatakiwa kuingia kwenye tovuti rasmi ya WhatsApp, kuunganisha akaunti yake kwa kuchanganua msimbo wa QR kwa kutumia simu yake, kisha kuchagua mawasiliano na kubofya alama ya simu au kamera ya video iliyo juu ya dirisha la mazungumzo.
Uzinduzi huo unaifanya WhatsApp kuendelea kupanua wigo wa huduma zake za mawasiliano ya kidijitali, huku ikirahisisha upatikanaji wa huduma kupitia vifaa mbalimbali ikiwemo kompyuta na simu za mkononi.
