Mvutano kuhusu mali ya marehemu Betty Bayo umechukua mkondo mpya baada ya mchungaji Victor Kanyari kutoa wito kwa aliyekuwa mume wa msanii huyo, Tash, kusikiliza na kuheshimu matakwa ya mama mzazi wa Betty katika suala hilo nyeti.
Kanyari amesema kuwa mama huyo bado ana machungu makubwa ya kumpoteza mwanawe, na kwamba kupuuza hisia zake kunaweza kumletea Tash madhara ya kiroho, akisisitiza kuwa laana inaweza kumpata asipoheshimu mzazi aliye katika majonzi.
Mvutano huo uliibuka baada ya mama mzazi wa Betty kudai kuwa mali ya marehemu iliandikishwa kwa jina lake, na kwamba Tash asijaribu kuingia kwenye mchakato wa kudai haki au kusimamia urithi bila ridhaa yake. Mama huyo pia ameonekana kuwa thabiti kwenye msimamo wake, akieleza kuwa yuko tayari kufungua shauri rasmi endapo kutakuwa na upinzani wowote.
Hadi sasa, pande zote hazijatoa tamko la pamoja, huku hali ikisubiriwa kwa hamu na mashabiki na familia kufahamu mwelekeo wa mgogoro huu unaohusisha mali, ustawi wa watoto, na hisia nzito za kuondokewa na mpendwa.
