Tag: jose chameleone

Mwanamuziki mkongwe kutoka nchini Uganda, Jose Chameleone, anatarajiwa kuzindua kituo kipya cha redio jijini Bujumbura, Burundi, kitakachoitwa Chameleone FM. Kwa mujibu wa taarifa kutoka vyanzo vya karibu na msanii huyo, Chameleone amenunua kituo cha zamani cha Black FM, ambacho sasa kinatarajiwa kuanza upya chini ya jina jipya la Chameleone FM, hatua inayolenga kuimarisha uwepo wake katika sekta ya vyombo vya habari nchini Burundi. Mbali na uwekezaji huo wa redio, ripoti zinaeleza kuwa Chameleone pia yupo katika hatua za mwisho za kufungua hospitali aliyoijenga katika eneo la Cankuzo. Inadaiwa kuwa mradi huo ni sehemu ya juhudi zake za kurudisha fadhila kwa wananchi wa Burundi kupitia huduma za kijamii, hususan katika sekta ya afya. Hatua hizi za uwekezaji zinakuja baada ya ziara ya Chameleone nchini Burundi, ambapo mwishoni mwa mwaka jana alikutana na Rais wa Burundi, Évariste Ndayishimiye. Katika kikao hicho, msanii huyo alieleza dhamira yake ya kuwekeza nchini humo na kuchangia maendeleo ya kijamii na kiuchumi.

Msanii nguli wa muziki kutoka Uganda, Jose Chameleone, ameadhimisha mwaka mmoja tangu alipougua na kulazwa kwa muda mrefu, tukio ambalo liliwagusa mashabiki na wadau wengi wa muziki Afrika Mashariki. Kupitia mitandao yake ya kijamii, Chameleone amesema kuwa siku kama ya leo mwaka mmoja uliopita alikuwa amelazwa kitandani akipambania maisha yake. Ameeleza kuwa kipindi hicho kilikuwa kigumu, lakini kilibadilika kuwa cha matumaini kutokana na msaada mkubwa alioupata kutoka kwa familia, marafiki na mashabiki. Msanii huyo ameeleza kuwa maombi, ujumbe wa faraja, simu pamoja na ziara kutoka kwa watu mbalimbali vilimpa nguvu na matumaini yaliyomsaidia kuvuka kipindi hicho kigumu. Chameleone amesema kuwa bila mchango wa wadau wote, asingefikia hatua alipo sasa kiafya. Amehitimisha ujumbe wake kwa kuwatakia wote Krismasi njema na heri ya Mwaka Mpya, huku akisisitiza kuwa anathamini sana upendo na mshikamano alioupata kutoka kwa mashabiki wake.

Mwanamuziki nguli kutoka Uganda, Jose Chameleone, ameeleza sababu zinazomfanya aendelee kumuunga mkono Rais Yoweri Museveni na chama tawala cha NRM, licha ya ukosoaji kutoka kwa baadhi ya wananchi. Akizungumza kwenye mahojiano maalum, Chameleone amesema uhusiano wake na Rais Museveni unatokana na heshima, shukrani, na imani kwamba chama hicho ndicho kimekuwa sehemu ya maisha yake tangu utotoni. Ameeleza kuwa anamheshimu Rais Museveni kama kiongozi mwenye uvumilivu, anayefanya maamuzi kwa busara na asiyeongozwa na hisia. Mwanamuziki huyo pia amefichua kuwa Rais Museveni aliwahi kumsaidia kifedha wakati alipokuwa akisumbuliwa na maradhi akiwa nchini Marekani, jambo analolitaja kama ishara ya utu na uongozi bora. Chameleone amesema ataendelea kuwa mwaminifu kwa Rais Museveni na chama cha NRM, akisisitiza kuwa anaamini kiongozi huyo ameendelea kutoa mchango mkubwa kwa maendeleo ya taifa la Uganda.

Kifo cha Waziri Mkuu wa zamani wa Kenya, Raila Amolo Odinga, kimegusa hisia za wasanii nchini Uganda, wakiongozwa na Jose Chameleone na Bobi Wine, ambao wametuma salamu za rambirambi kwa familia ya marehemu na wananchi wa Kenya. Kupitia Instagram, msanii nyota Jose Chameleone amemtaja Raila kama kiongozi aliyewaunganisha watu wa Afrika Mashariki kupitia siasa, utu, na msimamo wake wa kupigania demokrasia. Chameleone amesema Afrika Mashariki imepoteza kiongozi wa kipekee aliyekuwa mfano wa ujasiri na upendo kwa watu wake. Kiongozi wa chama cha National Unity Platform (NUP), Robert Kyagulanyi maarufu Bobi Wine, naye kupitia ujumbe wake katika mtandao wa X, amemsifia Raila kama kiongozi ambaye kwa miongo kadhaa alibaki kuwa sauti ya matumaini kwa waliodhulumiwa na aliyetetea haki za watu kwa ujasiri usioyumba. Wasanii wengine kutoka Uganda, akiwemo Eddy Kenzo, Sheebah, Spice Diana, na King Saha, pia wametuma salamu za rambirambi wakisisitiza kuwa Raila alikuwa kiongozi wa watu wote na alichangia kujenga uhusiano wa karibu kati ya Kenya na Uganda. Hata hivyo katika salamu zao za pole, wasanii hao kwa pamoja wametuma rambirambi kwa Mama Ida Odinga, familia ya Raila, na wananchi wote wa Kenya, wakiwatia moyo waendelee kudumisha maono na urithi wa kiongozi huyo. Salamu hizo kutoka Uganda zimepokelewa kwa heshima kubwa na Wakenya, wengi wakisifia umoja wa kikanda ulioonekana katika maombolezo haya, wakisema Raila Odinga ataendelea kukumbukwa kama Baba wa Mapambano na mwanamageuzi wa kweli wa Afrika.

Mwanamuziki nguli wa Uganda, Jose Chameleone, ameibua mjadala baada ya kuweka wazi kuwa hatakubali kukabidhi mali zake akiwa bado hai, licha ya mkewe Daniella kutaka usimamizi wa baadhi ya mali hizo katika shauri la talaka linaloendelea. Chameleone amesema mali alizojipatia ni kwa ajili ya watoto wake na anataka warithi mali hizo baada ya kifo chake, ili nao wazikabidhi kwa wajukuu wake. Hata hivyo, amesisitiza kuwa hatalazimishwa kuandika wasia mapema kwani anaamini bado ni jukumu lake kulinda urithi huo akiwa hai. Amefafanua kuwa shauri la talaka linaloendelea ni sawa na kumtaka aandike wasia kabla ya kifo chake, jambo analoliona halina mashiko. Pia amekanusha taarifa kwamba anaishi na msongo wa mawazo, akibainisha kuwa anaendelea vizuri na ana mtazamo wa kutambua kuwa mali ni vitu vya kupita ambavyo havipaswi kusababisha wasiwasi. Chameleone ameongeza kuwa, licha ya tofauti zilizopo kati yake na Daniella, wote wawili wanapigania lengo moja, kuhakikisha watoto wao wanapata maisha bora na urithi wa familia unabaki mikononi mwao.

Aliyekuwa mbunge, Mubarak Munyagwa, ameibuka na ushauri kwa msanii nyota wa Uganda, Jose Chameleone, akimtaka akubaliane na masharti yote yaliyowekwa na mkewe, Daniella Atim, katika mchakato wa talaka yao. Munyagwa amesema kuwa Chameleone ni msanii mwenye juhudi na uwezo wa kujenga au kununua nyumba nyingine, hivyo hana sababu ya kushikilia mali hiyo. Aidha, amesisitiza kuwa kukubali hata ombi la Daniella la kupata asilimia 60 ya mali ya Chameleone kutaleta amani na kulinda heshima ya familia. Kwa mujibu wa Munyagwa, Chameleone hafai kuonyesha hasira wala upinzani dhidi ya watoto wake kwani hali hiyo inaweza kuwafanya wamchukie kwa kutowelewa hali ilivyo. Hata hivyo, upande wa Chameleone umekuwa na msimamo tofauti. Ingawa yuko tayari kukubali talaka, amekuwa akipinga baadhi ya masharti ya Daniella, hasa kuhusu nyumba ya familia iliyoko Sseguku na malezi ya watoto. Mwanamuziki huyo anataka nyumba ibaki mali ya familia na malezi yawahusishe wote wawili badala ya Daniella pekee. Daniella, kwa upande wake, ameomba mahakama impe malezi kamili ya watoto wao, umiliki wa nyumba ya Sseguku, pamoja na fedha za matumizi ya kila mwezi kwa ajili yake na watoto. Pia amedai asilimia 60 ya mali za Chameleone ili kufanikisha maisha ya familia yake baada ya talaka hiyo.