Msanii wa muziki na mchekeshaji, Harmorapa, amefanikiwa kuhitimu shahada ya uzamili (Masters), hatua iliyowavutia na kuwafurahisha mashabiki wake mitandaoni.
Kupitia kurasa zake za mitandao ya kijamii, Harmorapa amechapisha video akiwa amevalia vazi la mahafali, akimshukuru Mungu kwa kufanikisha safari yake ya masomo. Ameeleza kuwa baada ya kujikita katika muziki kwa muda, aliona umuhimu wa kuongeza elimu yake.
Msanii huyo anasema sasa ana matumaini ya kupata ajira serikalini, akiamini kuwa masomo yake yatamfungulia fursa zaidi katika maisha. Amesisitiza kuwa masomo hayana mwisho, na akaongeza kuwa bila elimu hakuna maendeleo ya kweli katika jamii.
Hatua ya Harmorapa imeelezwa na wengi kama ujumbe muhimu kwa vijana, ikihimiza kuwekeza katika elimu kama nguzo ya maendeleo ya baadaye.
