Tag: HARMONIZE

Msanii nyota wa Bongo Fleva, Harmonize, amejipatia sifa kemkem baada ya mashabiki wake kuipokea kwa kishindo video ya wimbo wake mpya “LALA” aliyomshirikisha Abby Chams. Video hiyo, ambayo imekuwa gumzo mitandaoni, imepewa nyota tano na mashabiki wengi, huku ikitajwa kuwa Video Bora ya Mwaka 2025 katika ukanda wa Afrika Mashariki. Harmonize kupitia ukurasa wake wa Instagram ameonesha furaha yake, akisema kuwa hathamini sana namba au nyota alizopewa, bali anafarijika kuona kazi yake ikipokelewa kwa upendo. Msanii huyo amesifu jitihada za director Joma, akisema amefanya kazi safi na kuibua ubora uliowavutia wengi. Wengi wa mashabiki kupitia mitandao ya kijamii wameeleza kuwa “LALA” ndiyo video bora zaidi mwaka huu, wakisisitiza ubunifu, ubora wa picha na utayarishaji uliosukwa kwa umakini mkubwa. Kauli kama “LALA Looks Like East African Video of the Year 2025” zimekuwa zikijirudia mara kwa mara kwenye maoni ya mashabiki.

Mwanamuziki Harmonize ameibua tafsiri ya kichokozi kwa wapinzani wake baada ya kujitapa kuwa albamu yake ya 31 ikitoka itakuwa kubwa kiasi cha kumtambulisha kwa kila mtu bila shaka. Kupitia Insta Story yake, msanii huyo alionekana kujiamini kupita kiasi akisema albamu hiyo ni ya kipekee na itakuwa na nguvu ya kumweka kwenye ramani ya muziki kwa namna ambayo hakutakuwa na haja ya kutumia mtandao wa google ili kumjua. Kauli hiyo imefafsiriwa na baadhi ya mashabiki kama dongo kwa wasanii wanaotegemea kiki na mbinu za kibiashara ili kujulikana. Hata hivyo, msisitizo wake kuhusu albamu hii mpya umeibua maswali iwapo anajaribu kuwapiga vijembe wapinzani wake ndani ya Bongo Fleva hasa bosi wake wa zamani Diamond ambaye anadaiwa kuwa kwenye ugomvi na msanii wake wa zamani Mbosso kutokana uandishi wa wimbo uitwao Pawa. Mashabiki wake sasa wanangoja kwa hamu ujio wa albamu hiyo kuona kama kweli itatimiza maneno yake au ni tambo za kawaida za kimastaa.

Staa wa muziki wa Bongo Fleva, Harmonize, ametangaza rasmi kukamilika kwa albamu yake mpya inayojulikana kwa jina la “31”, akieleza kuwa kazi hiyo ni muhtasari wa maisha yake binafsi na safari ya muziki aliyopitia kwa miaka mingi. Kupitia ukurasa wake wa Instagram, Harmonize ameutaarifu umma kuhusu hatua hiyo muhimu katika taaluma yake, akifichua kuwa albamu hiyo imejaa hisia, uzoefu, mafunzo na mafanikio aliyopitia tangu alipoanza muziki. Katika albamu hiyo, msanii huyo ambaye pia ni mwanzilishi wa lebo ya Konde Music Worldwide, amewashirikisha wasanii wa kimataifa akiwemo nyota wa Nigeria Yemi Alade pamoja na msanii anayechipukia kwa kasi Draco. Mashabiki wake wamepokea taarifa hiyo kwa shangwe, wengi wakieleza kusubiri kwa hamu kusikia ladha mpya ya muziki kutoka kwa Harmonize ambaye amekuwa mstari wa mbele kusukuma muziki wa Afrika Mashariki katika majukwaa ya kimataifa. Ingawa tarehe rasmi ya kuachia albamu hiyo bado haijatangazwa, Harmonize ameahidi kuwa itakuwa kazi ya kipekee yenye ujumbe mzito na burudani ya hali ya juu kwa mashabiki wake kote duniani.

Staa wa muziki kutoka Tanzania, Harmonize, ameonyesha shukrani zake kwa mashabiki wake duniani kote kufuatia akaunti yake ya Instagram kufikisha wafuasi milioni 3. Kupitia ujumbe maalum aliouweka mtandaoni, Harmonize amewashukuru mashabiki kwa sapoti ya dhati waliyoitoa tangu alipoanza safari yake ya muziki. Mbali na hilo, Harmonize alitumia nafasi hiyo pia kutangaza kuwa kufikia mwisho wa mwaka huu, lebo ya Konde Gang itawatambulisha wasanii wapya wawili, hatua ambayo inalenga kupanua familia ya Konde Gang na kukuza vipaji vipya katika tasnia ya muziki. Aidha, Harmonize aliwaahidi mashabiki wake kuwa kuna ngoma kali zinazokuja hivi karibuni kabla ya mwezi Agosti, akitaja kuwa ataachia kazi mpya zinazofuatia mafanikio ya nyimbo zake zilizopita. Mashabiki wake mitandaoni wameonyesha furaha kubwa kwa hatua hiyo, wakimsifia kwa juhudi zake za kukuza muziki wa Bongo Fleva na kulea vipaji kupitia Konde Gang.

Msanii nyota wa Bongo Fleva, Harmonize, ameibua mijadala mitandaoni baada ya kuchapisha ujumbe kupitia Insta Story yake akieleza kuwa anatarajia kufunga ndoa hivi karibuni. Katika ujumbe huo uliojaa msisimko, msanii huyo alisema harusi yake haitakuwa ya kawaida, bali itahusisha sherehe sita kubwa zitakazofanyika katika maeneo mbalimbali. Kwa mujibu wa maelezo yake, Harmonize amesema harusi hiyo itaanza msikitini, kisha kuendelea kanisani, kufuatiwa na sherehe maalum katika Hifadhi ya Taifa ya Serengeti, kabla ya kuhitimishwa na party kubwa uwanjani. Hata hivyo, hakutaja jina la mchumba wake wala tarehe rasmi ya tukio hilo. Licha ya kauli hiyo kuibua hisia tofauti miongoni mwa mashabiki, wengi wamesalia na maswali kuhusu uhalisia wa mpango huo, huku baadhi wakitilia shaka kuwa huenda ni kiki ya kisanaa inayolenga kutangaza wimbo au mradi mpya wa muziki. Harmonize amekuwa maarufu si tu kwa kazi zake za muziki bali pia kwa matukio ya kuvutia umakini mtandaoni, jambo linalowafanya mashabiki wake kuwa waangalifu kila anapotangaza jambo kubwa. Kwa sasa, hakuna tamko rasmi kutoka kwa menejimenti yake kuhusu mipango hiyo ya ndoa.