Msanii wa muziki wa Gengetone kutoka nchini Kenya, Fathermoh, amependekeza pambano la ngumi kama njia ya kumaliza bifu linaloendelea kati ya wasanii wenzake Tipsy Gee na Toxic Lyrikali.
Kupitia mahojiano na wanahabari wa burudani, Fathermoh amesema kuwa mvutano kati ya wasanii hao wawili umevuka mipaka ya ushindani wa kimuziki na sasa unahitaji suluhu ya moja kwa moja ili kurejesha amani kwenye tasnia.
Msanii huyo wa Mbuzi Gang, ameeleza kuwa pambano hilo linaweza kufanyika kwa heshima, likisimamiwa na wadau wa muziki na michezo, ili kutoa nafasi kwa pande zote mbili kumaliza tofauti zao bila chuki wala fujo.
Mapendekezo ya Fathermoh yamezua mjadala mtandaoni, baadhi ya mashabiki wakiona ni njia ya kipekee ya kupunguza uhasama miongoni mwa wasanii, huku wengine wakionya kuwa pambano la aina hiyo linaweza kuendeleza migogoro badala ya kuitatua.
