Tag: AKOTHEE

Msanii asiyeishiwa na matukio kila leo, Akothee, ameibuka na taarifa njema kwa mashabiki wake baada ya kuruhusiwa kutoka hospitalini kufuatia kulazwa kwa muda kutokana na matatizo ya tumbo. Akizungumza mara baada ya kutoka hospitalini, Akothee ametoa shukrani za dhati kwa wote waliomuombea apone haraka na waliomtumia salamu za faraja wakati wa kipindi hicho kigumu. Ameeleza kuwa maombi na upendo wa mashabiki wake yamempa nguvu na matumaini makubwa ya kupona. Hata hivyo, amewashangaza wengi baada ya kufichua kuwa kulikuwa na baadhi ya watu waliotumia mitandao ya kijamii kumtakia mabaya, akiwemo wanaodaiwa kumtakia kifo. Amesema tukio hilo halikumvunja moyo, bali limempa sababu zaidi ya kuthamini wale wanaomuunga mkono kwa dhati. Akothee alikuwa amelazwa hospitalini baada ya kukumbwa na matatizo ya tumbo yaliyomfanya kupata maumivu makali. Kwa sasa, anasema afya yake imeimarika na ameanza kuendelea vyema chini ya uangalizi wa madaktari.

Mwanamuziki kutoka Kenya, Akothee, amefichua tukio la kutisha alilopitia alfajiri ya jana baada ya kuanguka chooni kutokana na maumivu makali ya tumbo. Kupitia ukurasa wake wa Instagram, Akothee amesema kuwa hali hiyo ilianza usiku wa manane baada ya kushuhudia video ya kutisha ya msichana aliyekuwa nyumbani kwake. Amesema tukio hilo lilimshtua kiasi cha kumsababishia maumivu makali, kutapika, kuharisha, na hisia za woga ambazo zilimfanya kushindwa hata kulala. Akothee ameeleza kuwa maumivu yalimfanya kulala ndani ya choo kwa kujaribu kupunguza hali hiyo. Amesema kufikia saa tisa asubuhi, nguvu zake zilimwishia na akaanguka sakafuni huku akijaribu kufika chumbani kwa watoto wake akiwa analia kwa maumivu makali. Mwanamama huyo amesema watoto wake walimpata akiwa amelala chooni na mara moja walimkimbiza hospitalini kupitia kitengo cha dharura. Amedai familia yake ilikabiliana na changamoto ya kupokea matibabu haraka baada ya muuguzi kuonyesha ukatili na kutokuwa na huruma. Hata hivyo Akothee amesema baada ya jitihada hizo, hatimaye alipatiwa matibabu na sasa anaendelea kupona, ingawa tukio hilo limemuacha akiwa na hofu kubwa.

Mwanamuziki kutoka nchini Kenya, Akothee, amefunguka kuhusu mabadiliko makubwa kwenye maisha yake baada ya kugunduliwa na matatizo ya kiafya yakiwemo mashambulizi makali ya kichwa (migraine), damu kuganda, na fibroids. Kupitia ujumbe mrefu kwenye ukurasa wake wa Instagram, Anasema hali hizo zimemlazimisha kupunguza kasi na kubadili mtazamo wake kuhusu maana ya nguvu na maisha. Akothee amesema changamoto hizo zimemfundisha kuwa nguvu ya kweli si kupambana kila wakati, bali ni kujipa nafasi ya kupumzika na kupona. Ameeleza kuwa sasa anaheshimu mwili wake zaidi, anaepuka presha zisizo za lazima, na kutilia mkazo amani na utulivu kama tiba yake kuu. Aidha, amewatia moyo wanawake wengine wanaopitia changamoto za kiafya kimyakimya, akisema hawapaswi kuona hali hizo kama udhaifu, bali kama safari ya mabadiliko na ukuaji.. Ameongeza kuwa sasa anaheshimu zaidi mwili wake na kuepuka presha zisizo za lazima. Kwa ucheshi wake wa kawaida, Akothee ametaniana na wafuasi wake akisema wanaweza kumuita “Fibroids, Migraines, Bloodclot Akoth Kokeyo,” huku akisisitiza kwamba upendo wa kweli ni ule unaoonyeshwa mtu akiwa hai, na kwamba huu ni wakati wake wa kuthamini utulivu.

Msanii kutoka Kenya, Akothee, ameonyesha masikitiko makubwa kufuatia dhihaka zinazomlenga Raila Odinga Junior, mwana wa hayati Raila Amolo Odinga, baada ya picha na video kusambaa mitandaoni zikionyesha baadhi ya watu wakicheka maumbile yake. Kupitia ukurasa wake wa Instagram, Akothee amelaani vikali tabia ya baadhi ya watu kutumia mitandao vibaya kwa kumkejeli Junior kutokana na maumbile yake. Amesema kizazi cha sasa kimepoteza utu, heshima na huruma, na kwamba baadhi ya vijana wanatumia mitandao ya kijamii vibaya kutokana na malezi duni. Msanii huyo amesema kuwa matendo kama hayo yakiachwa bila kudhibitiwa yanaweza kuchochea unyanyasaji hata kwa watu wenye ulemavu mitaani. Amesisitiza kuwa vijana wanaohusika lazima wachukuliwe hatua za kisheria ili wajifunze kuishi kwa heshima na utu katika jamii. Aidha, Akothee amemtumia ujumbe wa faraja Raila Junior, akimtaja kama shujaa anayestahili upendo na heshima kutoka kwa Wakenya. Pia amempongeza Mama Ida Odinga kwa uvumilivu wake na kuahidi kupigania heshima ya familia hiyo, akisema yuko tayari kushughulikia suala hilo kwa ukaribu. Kauli ya Akothee imezua mjadala mkubwa mitandaoni, wengi wakimpongeza kwa kusimama kidete dhidi ya unyanyasaji wa mtandaoni.

Mwanamuziki na mfanyibiashara maarufu wa Kenya, Akothee, ameandika ujumbe wa matumaini kwa mashabiki kupitia ukurasa wake wa Instagram akisimulia safari yake ya maisha iliyojaa changamoto na mafanikio yaliyotokana na bidii, nidhamu, na imani. Katika ujumbe huo, Akothee amekiri kuwa hakuwahi kuaminiwa na watu wengi alipokuwa akikua. Amesema kwamba hata katika mambo madogo kama masomo na ndoa yake ya awali kijijini, watu hawakuona mustakabali mkubwa kwake. Ameongeza kuwa licha ya wenzake kumzidi kwa hatua, aliendelea kuwashangilia kwa moyo mkunjufu na kusherehekea mafanikio yao bila wivu. Amesema kuwa sasa anajivunia kuona maisha yake yakiwa kwenye mstari, si kwa sababu kila kitu kiko sawa, bali amejifunza nidhamu na uthabitii unaomwezesha kukabiliana na changamoto za kila siku. Mwanamama huyo amesisitiza kuwa uvumilivu umemjenga, neema imembeba, na imani yake kwa Mungu imekuwa nguzo kuu ya mafanikio yake. Hata hivyo amehitimisha ujumbe wake kwa kueleza kuwa Mungu wake ni Mungu wa kuishi, akiwatia moyo mashabiki wake kutokata tamaa licha ya magumu wanayopitia.

Mwanamuziki na mfanyibiashara maarufu nchini, Esther Akoth maarufu kama Akothee, amefichua kuwa amekuwa akisumbuliwa na maumivu makali kwa zaidi ya miezi miwili na hatimaye amelazwa hospitalini tangu Jumatatu wiki hii. Kupitia waraka mrefu kwenye Instagram, Akothee alieleza kuwa maisha yake yamekuwa ya faragha kiasi kwamba mashabiki wake hawakujua hali yake ya kiafya hadi alipoamua kufunguka. Alisema alijisukuma kupita kiasi licha ya kubeba maumivu kwa zaidi ya miezi miwili. Shida hiyo ilijitokeza zaidi wakati wa mtihani wa pili ambapo ghafla akili yake iliganda, karatasi ya mtihani ikaonekana kumlemea na akaanza kuhisi kichefuchefu. Akiwa Homa Bay, alikiri kuwa alitegemea dawa za kupunguza maumivu na za kulegeza misuli ili kuendelea na majukumu yake, akiwemo kumalizia ratiba aliyokuwa ameahidi mashabiki wake. Hata hivyo, alipata shambulio jingine kali wakati alipotarajia kuruhusiwa kuondoka hospitalini, hali iliyomlazimu kuendelea kupata uangalizi wa karibu. Ujumbe wake umeonyesha ni kwa namna gani alijitolea kukamilisha majukumu yake licha ya hali ngumu ya kiafya, jambo lililoibua mjadala mkubwa kuhusu shinikizo la kazi na athari zake kwa wasanii na viongozi wa kijamii. Mashabiki wake wamejitokeza kwa wingi kumtakia nafuu ya haraka, huku wakimsifu kwa ujasiri wa kuendelea kusimama imara licha ya changamoto alizopitia.