Tag: bahati

Msanii wa muziki nchini Keny, Bahati, amekanusha madai kwamba anatumia sakata la mwanamke aliyejitokeza akidai ni mama yake mzazi kama mbinu ya kujipatia umaarufu mitandaoni. Bahati amesema tukio hilo limemshangaza kwa kuwa halikuwa sehemu ya mipango yake ya kujipatia kiki. Amefafanua kwamba mwanamke huyo amekuwa akimtafuta kwa zaidi ya miaka mitano, na hata aliwahi kuwasiliana na ndugu yake mkubwa bila mafanikio. Msanii huyo, ameeleza kuwa alimwona mwanamke huyo kwa mara ya kwanza kupitia video iliyosambaa mtandaoni, akisema kuwa ingawa baadhi ya mashabiki mitandaoni wanachukulia sakata hilo kama mzaha, kwake binafsi ni jambo lenye uzito. Hata hivyo amesisitiza kuwa hajawahi kupanga au kutumia hali hiyo kama njia ya kujipatia umaarufu, bali analichukulia kama tukio la maisha ambalo limemgusa kwa undani ikizingatiwa kuwa mama yake mzazi alifarikia miaka nyingi iliyopita.

Staa wa muziki nchini Kenya, Bahati, amejikuta katika hali ya huzuni na mshtuko mkubwa baada ya mwanamke mmoja kujitokeza mtandaoni akidai kuwa ndiye mama yake halisi, licha ya mama mzazi wa Bahati kufariki miaka mingi iliyopita wakati akiwa bado mtoto mdogo. Katika video aliyochapisha mitandaoni, Bahati ameeleza kuwa kifo cha mama yake alikishuhudia akiwa na umri wa takriban miaka saba, na hata kuhudhuria mazishi yake. Amesema kuwa maisha yake yote amekuwa na kumbukumbu hiyo wazi, jambo linalomfanya kushindwa kuelewa madai ya mwanamke huyo. Bahati ameonesha kuchanganyikiwa na kutokuwa na uhakika kuhusu hatua anazopaswa kuchukua. Ameeleza kuwa hana mawasiliano na mwanamke huyo, na hata hajui pa kuanzia ili kuthibitisha madai hayo. Amehoji pia kama inawezekana kufanyika uthibitisho wa DNA baada ya kifo cha mama yake na kusisitiza kuwa kama kweli mama yake angekuwa hai, hilo lingekuwa jambo la furaha isiyo na kifani maishani mwake. Msanii huyo, ambaye mara nyingi huonekana mchangamfu na mwenye utani, amesema kuwa suala hilo limemgusa kwa kina na kumwacha katika hali ya huzuni na maswali mengi bila majibu.

Msanii asiyeishiwa na matukio kila leo, Bahati, ameibuka tena mtandaoni akijigamba kuwa ndiye msanii pekee nchini Kenya mwenye nyimbo tatu zinazotamba kwenye orodha ya video kumi bora zaidi kwenye mtandao wa YouTube. Kupitia ukurasa wake wa mitandao ya kijamii, Bahati ameeleza kuwa anajivunia mafanikio hayo makubwa katika muziki wake, akisema ni heshima kubwa kwake kuona nyimbo tatu zake zikiwa zinatrend kwa wakati mmoja. Kauli yake imekuja muda mfupi baada ya nyimbo zake “First Love,” “Umenipendelea,” na “Bye Bye Baba” kuingia katika chati za ngoma zinazovuma nchini Kenya kwenye mtandao wa YouTube. Bahati ameendelea kuonyesha kuwa bado ana ushawishi mkubwa katika muziki wa kizazi kipya, huku mashabiki wake wakimpongeza kwa juhudi na uthabiti anaouonyesha licha ya changamoto na mijadala inayomzunguka mara kwa mara.

Msanii wa muziki wa kizazi kipya, Bahati, ameshindwa kuvumilia ukosoaji anaoupata mtandaoni baada ya kuonekana akilia hadharani akielezea machungu anayopitia kutokana na chuki na wivu kutoka kwa baadhi ya wasanii wenzake, hasa wale wa muziki wa Injili. Kupitia video aliyoshiriki kwenye mitandao ya kijamii, Bahati ameonekana mwenye majonzi akisema kwamba kama Mungu angekuwa binadamu, huenda maisha yake yasingekuwa salama kutokana na chuki na husuda za watu. Ameeleza kuwa mara nyingi amekuwa akihukumiwa kwa maamuzi yake ya kisanii na maisha yake binafsi, huku wengi wakisahau kwamba yeye ni binadamu wa kawaida anayekosea kama wengine. Bahati ambaye amepata ukosoaji mkubwa kutoka kwa mashabiki, ameongeza kuwa kila anapojaribu kuinuka, baadhi ya watu wamekuwa wakitamani ashindwe, jambo ambalo limekuwa likimuumiza zaidi akiona baadhi ya wasanii wa Injili wakiendelea kumuombea mabaya badala ya kumtakia heri. Hata hivyo ameahidi kuachia wimbo wake mpya wa kumshukuru Mungu kwa mafanikio aliyoyapata, akisema ni ushuhuda wa jinsi Mungu amemuinua licha ya changamoto na maneno ya watu. Bahati ameeleza kuwa hajawahi kujiona mkamilifu, lakini anaamini baraka zake zinatoka kwa Mungu. Amesema watu wengi hawajui machozi na maumivu aliyopitia ili kufika alipo sasa, na ndiyo sababu ameamua kutumia muziki wake mpya kama sala ya shukrani. Kauli ya Bahati inakuja muda mfupi baada ya kuomba mashabiki zake msamaha kutokana na miendo yake inayokwenda kinyume na maadili ya jamii kwa kujihusisha na maudhui yanayohamasisha ngono.

Msanii wa muziki mwenye utata kutoka Kenya, Bahati, amelazimika kuomba msamaha hadharani kufuatia wimbi la ukosoaji alilopokea kutokana na maudhui yake mapya tangu arejee kwenye muziki. Kupitia video aliyoipakia kwenye mitandao ya kijamii, Bahati ameeleza kuwa amepokea simu na jumbe nyingi kutoka kwa marafiki wa karibu, mashabiki, wachungaji, na hata watu wasiowajua, wakionesha kutoridhishwa na mwelekeo wa kazi zake za hivi karibuni. Amesema hakutaka kujibu kwa hasira au hisia kwa kuwa anawaheshimu wote, na badala yake aliamua kuzungumza nao moja kwa moja kutoka moyoni. Bahati amesema kuwa anatambua amewaudhi baadhi ya watu kutokana na mienendo na maudhui ya muziki wake wa sasa, hasa baada ya kurejea na wimbo wake mpya Set It. Ameeleza kuwa lengo lake halikuwa kuwakera, bali kuonyesha ubunifu wake kama msanii anayekua na kubadilika. Msanii huyo ameongeza kuwa anatambua umuhimu wa mashabiki wake, familia, na washirika wake wa karibu, akiwashukuru kwa kumuunga mkono kwa kipindi cha miaka 10 kwenye muziki. Kwa mujibu wake, mafanikio yake yamechangiwa zaidi na upendo na uvumilivu wa mashabiki wake kuliko uwezo binafsi wa uimbaji. Bahati pia ametumia nafasi hiyo kuomba radhi kwa wote aliowakera, akisema yeye ni binadamu anayejifunza kila siku. Amesisitiza kuwa anakubali kurekebishwa lakini pia anahitaji maombi na msaada wa wale wanaomuamini. Aidha, ameahidi kutorudia makosa ya kutayarisha maudhui yanayokwenda kinyume na maadili ya jamii, akisema anajitathmini upya ili kuhakikisha kazi zake za baadaye zinabeba ujumbe chanya na wenye manufaa kwa mashabiki wake. Kauli yake inakuja mara baada ya kuachia wimbo wenye utata uitwao Set It, ambao umeonekana kuhamasisha ngono na kuibua mjadala mkali mitandaoni. Mbali na hilo, Bahati pia alichapisha misururu ya video zinazomuonyesha akiwa amevalia chupi na nyingine akinywa mvinyo alioshea miguu ya mkewe, Diana Marua, jambo lililowakera mashabiki wengi waliomkosoa kwa kupoteza maadili aliyojulikana nayo awali.

Mwanamuziki kutoka Kenya, Bahati, ametangaza kuwa ataachia wimbo maalum wa kuomboleza kifo cha kiongozi wa ODM, Raila Odinga, mchana wa leo. Kupitia ukurasa wake wa mitandao ya kijamii, Bahati amesema kuwa wimbo huo ni njia yake ya kumuenzi kiongozi huyo ambaye, kwa mujibu wake, amekuwa nguzo muhimu katika siasa za Kenya na amegusa maisha ya wengi. Amesema kifo cha Raila kimeacha pengo kubwa ambalo halitasahaulika. Bahati anajiunga na wasanii wengine waliotoa nyimbo za kuomboleza, akiwemo Akothee, Prince Indah, na Embarambamba, ambao kwa nyimbo zao wameonyesha upendo na heshima zao kwa marehemu kiongozi huyo. Ikumbukwe kwamba mwaka wa 2022, wakati wa uchaguzi mkuu, Bahati alikuwa karibu sana na Raila Odinga baada ya kutangaza kugombea ubunge wa Mathare kupitia mrengo wa Azimio la Umoja One Kenya. Uhusiano wao wa kisiasa na wa kibinadamu ulionekana wazi kupitia matukio waliyoshiriki pamoja.